Монгол Улсын гавьяат жүжигчин, дуучин Ж.Алтанцэцэг, Соёлын тэргүүний ажилтан, дуучин С.Сэрчмаа нар “Altaa & Sally-21” нэртэй аялан тоглолтоо энэ сарын 20-нд Ховд аймгаас эхэлсэн. Харамсалтай нь, уг тоглолтоо дуучин С.Сэрчмаа хэсэг хугацаанд цааш нь үргэлжлүүлэх боломжгүй болжээ. Учир нь түүнийг тоглолтоор явах үед аав нь бурхны оронд оджээ. Тиймээс дуучин маань Увс, Баян-Өлгийд болох тоглолтоо үргэлжлүүлэх боломжгүй болсноо мэдэгдэж, ард түмнээсээ уучлалт хүсчээ. Тэрээр өчигдөр өөрийн facebook хуудсандаа “Өглөөний мэнд. Их уйлаад нүд хавдсан байна. Хангай хаан шиг өмөг түшиг болсон сайхан аав минь тэнгэрт байгаа ээж дээр минь очлоо. Ард түмэндээ амласан амлалт, аавын минь захисан итгэлийн дагуу баруун бүсийн тулгуур болсон Ховд аймгаас эхэлсэн аялан тоглолт минь хоёр удаа заал дүүрэн үзэгчидтэй  тоглож амжилттай өндөрлөсөн. Баян-Өлгий, Увс аймгийн тоглолтон дээр хүндэтгэх шалтгааны улмаас С.Сэрчмаа нь очиж амжихгүй боллоо. Сонсогч үзэгчид минь ойлгож хүлээн авахыг хүсье. Ж.Алтанцэцэг эгч минь Баян-Өлгий аймагт тоглож байгаа байх аа. Есдүгээр сарын 24-нд Завхан аймгийн төвөөс бидний тоглолт амласан ёсоороо үргэлжилнэ” гэжээ.