БНХАУ-ын Ухань хотноо зохиогдсон Дэлхийн цэргийн спортын VII дугаар их наадамд манай “Алдар” спорт хорооны баг тамирчид 82 хүний бүрэлдэхүүнтэйгээр оролцлоо. Дэлхийн цэргийн спортын наадам энэ сарын 18-нд эхэлж өчигдөр өндөрлөв. Энэ удаагийн наадмаас манай тамирчид нэг алт, гурван мөнгө, таван хүрэл, нийт есөн медаль хүртлээ. Монголын багийн анхны медалийг жүдо бөхийн төрлөөр Э.Ариунболд, Б.Эрхэмбаяр нар хүрэл медаль авч эхлүүлсэн. Тэдний дараа эмэгтэй чөлөөт бөхийн төрлөөр дэлхийн аварга, гавьяат тамирчин С.Цэрэнчимэд мөнгө, Э.Даваанасан хүрэл медаль авсан. Улмаар буудлагын спортын 25 метрийн гар бууны төрөлд 2008 оны Бээжингийн олимпын наадмын мөнгөн медальт, хөдөлмөрийн баатар, гавьяат тамирчин О.Гүндэгмаа алтан медаль хүртэж Ухань хотын тэнгэрт алтан соёмбот далбаагаа өндөрт өргөж, төрийн дууллаа эгшиглүүллээ. Мөн энэ төрөлд Г.Хэрлэнцэцэг мөнгөн медаль зүүв. Тэгвэл медалийн буухиаг манай боксын тамирчид үргэлжлүүлж эрэгтэй  56 кг-д өрсөлдсөн Х.Энх-Амар мөнгө, 52 кг-д Х.Энхмандах, 81 кг-д Н.Шинэбаяр нар хүрэл медаль хүртлээ.