Монголын Урчуудын эвлэлийн Өмнөговь аймаг дахь салбарын санаачилгаар Өмнөговь аймгийн байгалийн сайхныг судалбар зургаар дамжуулан сурталчлан, уран бүтээлд мөнхлөн үлдээх, МУЭ-ийн хот, орон нутгийн салбар хоорондын хамтын ажиллагааг идэвхжүүлэх зорилгоор “Өмнийн сайхан говиор” төслийг наймдугаар сарын 04-ний өдрөөс 14-ний хооронд хэрэгжүүлжээ. Төсөлд нийт 16 уран бүтээлч хамрагдан Өмнөговь аймгийн Даланзадгад, Сэврэй, Баяндалай, Ноён, Гурвантэс сумдын нутаг Мухар шивэрт, Ёлын ам, Дүнгэнээгийн ам, Хөнхөр хацавч, Ханын хэц, Ноён богд уул, Толь хад, Саран хөндий, Хэрмэн цав, Зуун мод, Зулганай, Нэмэгт, Гэлбэнт, Хонгорын элс, Баруун сайхан баян бор нуруу, Баянзаг зэрэг байгалийн үзэсгэлэнт 21 газраар 1100 км аялан олон судалбар ажил хийжээ. Уг судалбар аялалд оролцсон Монгол Улсын Урлагийн гавьяат зүтгэлтэн, МУЭ-ийн нэрэмжит шагналт зураач С.Дагвадорж, МУЭ-ийн нэрэмжит шагналт зураач С.Машбат, МУСТА Д.Пүрэвдорж, МУСТА Д.Батбилэг, С.Баярбаатар, МУСТА Т.Цоггэрэл, Б.Чулуунбаатар, МУСТА А.Сонинбаяр, Ч.Одпүрэв, Б.Сарангоо, Б.Гэрэлцэцэг, Н.Мөнхзаяа, МУСТА О.Хүдэрчулуун, Б.Аринтуяа, Ц.Солонго, Ж.Бэхбилэг нарын 16 уран бүтээлч энэхүү судалбар аяллынхаа тайлан болгож “Өмнийн сайхан говиор 2019” хамтарсан үзэсгэлэнг “Сэнгэраги” арт галерейн танхимд өнөөдөр нээх юм.