Япон хүмүүс яаж ийм дэг журам, сахилга баттай байж чаддаг байна. Монголчууд яагаад ийм хариуцлагагүй, бардам, бүдүүлэг, увайгүй байдаг байна аа? Япончуудын хувьд хариулт нь их амархан. Хүний баримтлах ёстой дэг журам, ёс зүйг л тэд ягштал баримталдаг. Бусдад төвөггүй амьдрах бол япончуудын амьдрахын гол утга учир. Мөн тэдэнд  “өөрийгөө буруутгах соёл” гэж нэрлэдэг нэг соёл бий. Жишээлбэл Монголд жуулчлан ирсэн нэгэн япон хүн донсолгоотой замд олон хоног сэгсрэгдээд, дээрээс нь, ажилдаа сэтгэлгүй орчуулагчийн үйлчилгээнд ахин нэг ядраад, нутаг буцахын хүслэн болж гэнэ. Харин тэр япон хүн тааруухан аялалдаа өөрийгөө буруутгаж “Би яах гэж ийм улсад ирсэн юм, Монголд аялахыг  сонгосон нь миний өөрийн л буруу” гэж үглэсээр буцаж л дээ. Өөрийгөө буруутган, өөртөө хатуу хандаж байгаа хүн бол дахиж ийм алдаа гаргахгүй. Харин монголчуудын хувь алдаа бүхэн бусдынх байдаг.  Яагаад гэвэл тэр монгол хүн буруугаа өөр хүнд тохсоноор өөрийгөө хариуцлагаас “чөлөөлчхөж” байгаа юм. Өөрийнхөө ч өмнө мөхийж сураагүй тэнгэрлиг монголчуудын хамгийн том алдаа нь энэ ч юм билүү.