Өнгөрсөн наймдугаар сард Япон дахь Microsoft компанийн салбар сонирхолтой туршилт эхлүүлсэн нь долоо хоногийн ажлын өдрийг тав биш дөрөв болгосон явдал байв. Энэхүү туршилт нэг сарын хугацаанд үргэлжилэн компанийн 2300 ажилчныг хамруулжээ.
Туршилтын явцад уулзалтуудын үр дүн өндөр, ажилчид илүү аз жаргалтай, компанийн үр бүтээмж 40 хувиар нэмэгдсэн байна. Япон дахь Microsoft-ийн салбарын Гүйцэтгэх захирал Такуя Хирано албан ёсны мэдэгдэлдээ “Богино хугацаагаар ажиллаж, сайн амар, ихийг сур. Би ажилчдаа 20 хувийг бага хугацаанд хэрхэн өмнөх шигээ үр бүтээмжтэй ажиллаж болохыг мэдрээсэй гэж хүсч байна” гэжээ.
Үр бүтээмж нэмэгдсэнээс гадна компанийн зардал ч багассан байна. Тодруулбал, туршилтын хугацаанд, ажилчид өмнөхөөсөө 25 хувиар бага завсарлага авч, 23 хувиар бага цахилгаан хэрэглэсэн бол, хэвлэмэл материалыг 59 хувиар бага хэрэглэсэн. Мөн туршилтад хамрагдсан ажилчдын 92 хувь нь ажлын дөрөв хоногтой байх таалагдсан гэж хариулжээ.
Энэ төрлийн туршилт өмнө нь хийгдэж байсан. Жишээлбэл, Шинэ Зеландад Perpetual Guardian компани хоёр сарын турш ажлын дөрөв хоногтой болгох туршилтыг 240 ажилчдын дунд хийжээ. Үр дүнд нь бүтээмж нэмэгдэж, ажилчдын стрессийн түвшин долоон хувиар буурчээ. Үүнээс гадна цөөн цаг эсвэл цөөн хоног ажиллах нь бүтээмжийг нэмэгдүүлдгийг батлах олон судалгаа бий.
Япон дахь Microsoft-ийн салбарын энэхүү туршилт хэдий үр дүн сайтай гарсан ч цаашид дагаж мөрдөх эсэх нь тодорхойгүй байгаа аж. Түүнчлэн энэ өвөл туршилтыг ахин хэрэгжүүлэхээр болжээ.