Цаг барьдаггүй хоцордог эсвэл тохирсон цагтаа байдаггүй хүмүүсээс болж ард нь маш их  асуудал үүсдэг. Цаашдаа цаг барьдаггүй хүмүүс ажил хэрэгч ертөнцөөс шахагдах болно гэж судлаачид үзжээ. Учир нь орчин үед хамгийн  үнэтэй эрдэнэ нь   алт биш харин цаг хугацаа болно гэдгийг тэд баталж байгаа юм. Харин манай монголчууд албаны,  хувийн ямар ч ажилд цаг барихдаа хамгийн хойрго хүмүүс. Үүнээс болж хүлээж буй хүний дараагийн ажил хойшлогдох, хоцрох, цагтаа амжихгүй дахин хүмүүсийг хүлээлгэснээс эвгүй байдалд орох эрсдэл үүсдэг. Цаг барьдаггүй бүдүүлэг нэгнээс хөрөнгө оруулагчийн уулзалтаасаа хоцорч маш их санхүүгийн алдагдал хүлээсэн түүх ч байдаг аж. Орчин үеийн бизнесийн ертөнц тэр аяараа цаг хугацаа нь мөнгөөр хэмжигдэж мөн багаар ажилладаг тогтолцоотой. Бүхэл бүтэн багийн ажлын төлөвлөлт, зохион байгуулалтыг нэг бүдүүлэг нөхөр эвдэж байгаа бол түүнд ямар ч харилцагч үлдэхгүй нь тодорхой. Тиймээс та ажилгүй, бүтэлгүй нэгэн гэдгээ “баталж” гэр бүлээсээ өөр хүнгүй үлдэхийг хүсвэл хоцор. Дахиад ч хоцор. Та дэлхийгээс хоцрох болно.  Учир нь танд өөрөө өөртэйгөө л үлдэх 24 цаг бий. Ажил хэрэгч, соёлт нийгэмд бол харин тийм цаг үгүй.