Боксын залуучуудын Ази тивийн аварга шалгаруулах тэмцээн Буянт Ухаа спортын ордонд үргэлжилж байна. Өчигдөр медалийн төлөөх тоглолтууд боллоо. Эхлээд эрэгтэй боксчид рингэнд гарч өрсөлдсөн. Өчигдөр манай дөрвөн эрэгтэй боксчин тулалдав.
56 кг-ын жинд өрсөлдсөн Тэгшжаргалын Энхтөр Киргизстаны Мирзохид Имамназаровыг 5:0-ийн харьцаагаар, 64 кг-д хүч үзэж буй Асхарын Жандос Киргизстаны Едил Бахтыбекулыг 5:0-ээр тус тус ялж, манай хоёр боксчин хүрэл медалийн болзол хангаж, хагас шигшээд шалгарлаа.
Харамсалтай нь, үлдсэн хоёр ширэн бээлийтэн тэмцээнээ дуусгав. 49 кг-ын Э.Сүхбат Казахстаны Мухамедсабыр Базарбайулыд, 69 кг-д Ц.Луваанжалбуу Узбекистаны Нурислом Исмойловт ялагдлаа.
Мөн манай дөрвөн эмэгтэй боксчин өчигдөр орой медалийн төлөөх тоглолтоо хийсэн. Эмэгтэйчүүдийн 48 кг-д Б.Жанаргүл, 54 кг-д Б.Золжаргал, 60 кг-д Г.Бадмаараг, 69 кг-д Э.Намуун нар медалийн төлөө тулалдав.  Рингэнд эхэлж гарсан 48 кг-д өрсөлдөж буй Бейсенбайн Жанаргүл Тайваний боксчин Ши Ю Бэйг 5:0-ийн харьцаагаар ялж хүрэл медалийн болзол хангав. Түүний дараа 54 кг-ын Баттөрийн Золжаргал Казахын Молдир Тойковаг 5:0-ээр ялж, хагас шигшээд шалгарлаа. 60 кг-ын Ганзоригийн Бадмаараг БНСУ-ын Михюн Жотой шөвгийн наймд учраа таарч 3:2-ын харьцаагаар ялав. Монголын боксчдоос хамгийн сүүлд рингэнд 69 кг-ын Эрдэнэцогтын Намуун гарсан. Тэрбээр Узбекистаны Хадишабану Абдуллаеватай өрсөлдөж 0:5-аар ялагдав. Ийнхүү өчигдөр манай таван боксчин ялалт байгууллаа.
Манай эмэгтэй боксчдоос 57 кг-д О.Есүгэн, -81 кг-д Алтанзул, +81 кг-д Б.Маргад-Эрдэнэ  нар аль хэдийн хүрэл медалийн болзол хангачихсан байгаа.