Мөсөнд авиралт нь дэлхий нийтийн залуусын шинэ үеийн тренд спорт болон хөгжиж байна. Энэ тэмцээн нь Монгол Улсад өвлийн аялал жуулчлалын шинэ бүтээгдэхүүн бөгөөд аялал жуулчлалын улирлыг уртасгах томоохон арга хэмжээнүүдийн нэг.
  Монгол Улсын хувьд мөсөнд авиралтын уралдаан тэмцээн явуулдаг ганц гэж хэлж болохоор газар нь Улаан Цутгалангийн хүрхрээ юм. 2022 оны Бээжингийн олимпод орох хамгийн өндөр боломжтой спортын төрөл энэ юм.
  2012 оноос эхлэн монголчууд мөсөнд авиралтыг Монголдоо хөгжүүлж, тамирчдаа бэлтгэн тив, дэлхийн аваргын тэмцээнүүдэд оруулж эхэлсэн бөгөөд Монголын тамирчид Азийн аваргаас мөнгө, хүрэл медалиудыг эх орондоо авчраад байгаа. Газар газрын мөсөнд авирагчид багаж зэвсгээ үүрээд Орхон голын Улаан Цутгалангийн хүрхрээг зорин очиж хоёр өдрийн туршид хурд хүч, авхаалж самбаагаа сорин өрсөлддөг. “Ice Challenge Mongolia” тэмцээн цар хүрээгээ тэлж “Karakorum Ice Festival” нэртэйгээр энэ сарын 7-8-нд Улаан цутгалангийн хүрхрээнд болох бөгөөд тэмцээний ялагч нь нэг сая төгрөг, цомын эзэн болох юм. Орхоны Улаан цутгалангийн хүрхрээг зорих замдаа Монгол Элс буюу Элсэн Тасархай, Хархорины Эрдэнэзуугийн хийд, Хужирт тосгон, Төвхөн хийд, Үүртийн тохой гээд олон сонирхолтой газруудыг үзэж сонирхох боломжтойгоос гадна монгол гэрт хоноглож, малчин айлд зочилж аж амьдралтай нь танилцаж тэмээ, морь, сарлаг унаж үзэх боломжтой.