Монголын кино институтиэс 7 дахь жилдээ зохиогдож буй "Алтан хальс" олон улсын кино наадам "iCinema" кино театрт зургадугаар сарын дөрөвнөөс наймны өдрүүдэд зохион байгуулагдах гэж байна. Кино сонирхогчдын анхаарлыг зүй ёсоор татдаг "Алтан хальс" наадмаар дэлхийн шилдэг бүрэн хэмжээний кинонууд, уралдаант хэсгийн богино бүтээлүүд үзэгчдийн хүртээл болох юм. “Алтан хальс” наадам  уран бүтээлчдэд бүтээн туурвих урам зориг өгч, үзэгчдэд гоо зүйн таашаал олгодгоороо онцлогтой. Үүнээс гадна кино наадмын хүрээнд нэр хүндтэй найруулагчдын мастер класс үнэ төлбөргүй зохиогдож, кино урлагийн салбарт тулгамдаж буй асуудлаар олон сонирхолтой хэлэлцүүлэг өрнөдөг юм. Энэ удаагийн наадам Хятадын найруулагч Ван Чюананий “Өндөг” киногоор нээлтээ хийх бөгөөд үзвэр бүр 5000 төгрөгийн үнэтэй ажээ.