Шинэ төрлийн коронавирусийн халдвар дэлхий даяар тархаж байгаатай холбогдуулан 2020 оны зуны олимпын тоглолтыг хойшлуулахад хүрч болзошгүй гэснийг Японы Ерөнхий сайд Шинзо Абэ үгүйсгэсэнгүй. Тэрээр парламентын хуралдаан дээр үг хэлэхдээ ингэж мэдэгджээ. Ш.Абэгийнхаар олимпын тоглолтыг бүрэн хэмэжээнд зохион байгуулж чадахгүйд хүрвэл хойшлуулах хувилбар байж болох юм гэнэ. “Олон улсын олимпын хорооны санал ч миний байр суурьтай ижил байгаа. Үнэхээр олимпыг бүрэн хэмжээгээр зохион байгуулахгүйд хүрвэл бид тамирчдынхаа эрүүл мэндийг бодож хойшлуулах шийдвэр гаргана” гэж Шинзо Абэ хэлжээ. Юуны түрүүнд бид тамирчдынхаа тухай бодох ёстой гэж тэр онцолсон байна. 

Коронавирусийн тархалтаас болоод олимпын наадмыг хойшлуулна уу хэмээн Норвеги, Бразилын олимпын үндэсний хороод энэ сарын 21-ний өдөр ОУОХ-ны ерөнхийлөгч Томас Бахад хандан хүсэлт гаргасан байна. ОУОХ ч энэ талаар нэг сарын хугацаанд тодорхой шийдвэр гаргана хэмээн хариулжээ. Канадын үндэсний олимпын хороо ч Токио-2020 наадамд тамирчдаа илгээхгүй гэдгээ мэдэгдээд олимпын тоглолтыг хойшлуулаач хэмээн ОУОХ-д ханджээ. Reuters агентлагийн эх сурвалжийн мэдээлснээр тэмцээн уралдаан явуулах өөр хувилбарыг ОУОХ судалж байгаа гэнэ. Олимпын тоглолтыг зохион байгуулах шинэ товыг олон улсын олимпын хороо одоогоор тогтоогоогүй хэмээн өөр нэг эх сурвалж хэлжээ. Гэхдээ л олимпын тоглолтыг нэг юм уу хоёр жилээр хойшлуулж магадгүй гэсэн байна. Зуны олимпын тоглолт Японы нийслэл Токиод ирэх долдугаар сарын 24-нөөс наймдугаар сарын 9-ний өдрүүдэд болох ёстой.