-Зөгийн гэр хэдэн талсттай байдаг вэ?

-Зургаа.

-Итгэлтэй байна уу?
-Тийм ээ. “Да Винчи ба Митрагийн тайлагдашгүй нууц” нэвтрүүлгээр гарсан. Баттай мэдэж байна. Энэ бол миний хүү “Мөнгөтэй зочин” нэвтрүүлэгт орохдоо итгэл төгс хариулсан гурван асуултынх нь нэг. Сансар огторгуй, дэлхийн тогтоц, байгаль, амьтантай холбоотой зүйлсийг сонирхдог хүүгийн минь хувьд зөгий их чухал “найз” нь. Нэг удаа бүр зөгий байхгүй бол дэлхий сүйрнэ гэж хэлсэн удаатай. Энэ нь ч бас оргүй зүйл биш. Цэцэг дамжин нисэх зөгий үгүй бол тоос хүртэхгүй, тэгэхээр ургамал, цэцэгс ургахгүй. Зөгий нь дэлхий дээрх хүнсний ногооны тоосжуулалтад нэн чухал үүргийг гүйцэтгэдэг бөгөөд бидний өдөр тутамдаа идэж хэрэглэж буй хоол хүнсний гуравны нэг нь тоос хүртээлтээс хамааралтай байдаг. Түүнчлэн тоос хүртээгч шавжгүйгээр аливаа ургамлууд ургаж чаддаггүй билээ. Харин зөгий нь хамгийн гол тоос хүртээгч шавж бөгөөд үүнд бусад төрлийн шавж, шувуу, сарьсан багваахай зэргийн оролцоо маш бага байдаг гэсэн тооцоо бий. Тухайлбал, авакода, шар буурцаг, гүнжид, өргөст хэмх, цитрус жимс, тоор, киви, интоор, нэрс, хэрээний нүд, брокколи, цоохор майлз, хулуу, амтат гуа гэх мэт олон жимс, хүнсний ногоонуудад зөвхөн зөгий л тоос хүртээж, тэднийг амьдруулдаг аж.
Их Британийн “Зөгий үржүүлгийн нийгэмлэг”-ийн тооцоогоор зөвхөн Англи улсад гэхэд л зөгийн аж ахуйнууд жил бүр 185 сая ам.долларын татвар төлдөг. Энэ нь хоол хүнсэнд ашиглагддаг олон төрлийн цэцэгт ургамлын ургац зөгийн тоос хүртээлтээс хамааралтай байдагтай холбоотой. Харин зарим ургац зөгийнөөс шууд тоос хүртдэггүй ч биологийн тархалт явагддаг орчинд шууд бусаар ашиг тусаа өгсөөр л байдаг аж. Түүнчлэн Мексикт л гэхэд зөгийний тоос хүртээлтийн ашиг тус хоёр тэрбум ам.доллароос ч илүүгээр үнэлэгддэг юм.
Өнгө өнгийн цэцэгс алаглан ургасан хөдөө тал, ой нугыг төсөөлөөд нэг үзээрэй. Зөгий байхгүй бол энэ бүхэн үгүй болно. Дэлхийд цөөрч байгаа энэ гайхамшигтай шавжны ач тус дэндүү их. Өглөөний цайндаа хүртдэг балнаас нь эхлээд өөр олон ач тусынх нь төлөө зөгийг хайрлах учиртай. Өнөөдөр дэлхийн зөгийн өдөр. Бас дэлхийн уур амьсгалын өөрчлөлтийн эсрэг өдөр. Хоёулаа өөр зүйлийн тухай сануулах зорилготой зарлагдсан хэдий ч эцсийн дүндээ эх дэлхийнхээ төлөө агуулгатай юм шүү.