Коронавирусийн цар тахалтай тэмцэх үйлсэд зориулан их хэмжээний мөнгөн хандив цуглуулсан өндөр настанд Их Британийн хатан хаан Элизабет Хүлэг баатрын хэргэм хүртээжээ. “Ахмад Том” нэрээр алдаршаад буй Британийн армийн офицер асан Том Мур дөрөвдүгээр сард өөрийн 100 насны төрсөн өдөр гэрийнхээ арын хашаанд бусдын тусламжгүйгээр 100 алхам хийх зорилго тавьснаа зарлаж, энэ оролдлогынхоо үеэр цар тахалтай тэмцэх үйлсэд зориулж олон нийтээс хандив цуглуулахаар болсон юм. Тэрбээр эхлээд ердөө 1000 паунд цуглуулах зорилго тавьсан ч санаанд оромгүй амжилт олж, 1.5 сая гаруй хүнээс 32 сая паунд ($40 сая) босгож чаджээ. Энэхүү гавьяаных нь төлөө ахмад Томд хүлэг баатрын хэргэм хүртээлгэхээр нэр дэвшүүлж байгаагаа Британийн ерөнхий сайд Борис Жонсон тавдугаар сард зарлаж байв. Хатан хаан Элизабет өөрийн эцэг VI Жоржийн илдээр ахмад Томыг адислаж, язгууртны хэргэм хүртээсэн байна. Ийм хэргэм хүртсэн хүн нэрнийхээ өмнө “Sir” хэмээх өргөмжлөл бичүүлж, дуудуулах эрхтэй болдог юм.