“Монгол уран дархан 2019” үзэсгэлэн өчигдөр Монголын уран зургийн галерейд нээгдлээ. Уг үзэсгэлэнгийн зохион байгуулагчаар Монголын Уран дархны Түмэн эрдэнэс нэгдсэн холбоо, Монгол төрийн дархны нэгдсэн холбоо, Монгол Улсын Ерөнхийлөгчийн Тамгын газар, БСШУСЯ зэрэг төрийн болон төрийн бус байгууллага хамтран ажиллаж байгаа юм. Ерөнхийлөгч Х.Баттулгын ивээл дор хоёр дахь жилдээ зохион байгуулж буй “Монгол уран дархан 2019” үзэсгэлэнд манай улсын шилдэг 100 гаруй уран дархчуудын 400 орчим бүтээл тавигдаж, галерейн их танхимд долдугаар сарын 7-ныг хүртэл үзэгч олны хүртээл болох аж.

Монголчууд дархан хүнийг бурхан ухаантай гэдэг. Бурхан багшийн хөргөөс XIII зууны хаант төр, Өндөр гэгээн Занабазарын дахин давтагдашгүй бүтээл хийгээд Монгол эмээл, морин хуур, ломбо, мөнгөн аяга, цар гээд зөвхөн Монгол ахуй, өв соёл “үнэртэх” дэлхийн хаана ч байхгүй эрт эдүгээг хослуулсан уран нарийн хийц бүхий бүтээл олны нүдийг хужирлаж байна.