Дэлхийд алдартай домогт “Металлика” рок хамтлаг ОХУ-ын нийслэл Москва хотод зохион байгуулсан концертын үеэр Виктор Цойгийн дууг орос хэлээр дуулсан байна. Уржигдар орой Москвагийн “Лужники” цэнгэлдэх хүрээлэнд “Металлика” хамтлагийн тоглолт болсон юм. Цэнгэлдэх хүрээлэн домогт хамтлагийн фанатуудаар дүүрч, оросууд нэг орой бут авсан байна. Концертын дундуур “Металлика” хамтлагийн гоцлол дуучин Жеймс Хэтфилд Оросын нэрт дуучин Виктор Цой агсны “Группа крови” дууг дуулжээ. Концертын хамгийн том сюрприз  болсон уг дууг үзэгчид даган дуулсан байна. “Металлика” хамтлаг дэлхийг тойрсон аялан тоглолтын хүрээнд Москвад ийнхүү концертоо толилуулжээ. Домогт хамтлаг байгуулагдаад 38 жил болж байгаа ч дэлхий даяар олон сая шүтэн бишрэгчтэй, алдартай хэвээрээ аж.