Дорнод Африкийн Этиоп улс даяар өнгөрсөн Ням гарагт мод тарих арга хэмжээ зохион байгуулж, нийт 350 гаруй сая мод суулгажээ. Уур амьсгалын өөрчлөлт, цөлжилттэй тэмцэхийн тулд тус улсын Засгийн газар “Ногоон өв” нэртэй санаачилгыг эхлүүлж, энэ зуны турш дөрвөн тэрбум мод суулгах зорилт тавьсан нь иргэн бүр доод тал нь 40 мод суулгана гэсэн үг юм.
НҮБ-ын тоо баримтад өгүүлснээр 2000-аад оны үед Этиопын газар нутгийн дөнгөж дөрвөн хувь нь ой модоор бүрхэгдсэн байжээ. 100 жилийн өмнө энэ хэмжээ 35 хувьтай байсан гэнэ.
Ням гарагт орон даяар нийт 353 сая мод суулгасныг Этиопын инновац, технологийн сайд, доктор Гетахун Мекура твиттер хуудсандаа мэдээлжээ.
Нэг өдөрт хамгийн олон мод суулгасан дээд амжилтыг Энэтхэг улс 2016 оноос хойш эзэмшиж байснаа ийнхүү Этиоп улсад алдаж байна. Тухайн үед энэтхэгчүүд нэг өдрийн дотор 50 сая мод суулгаж байжээ.