Дэлхийн улс орнууд “Хөгжлийн бэрхшээлтэй хүний эрхийн олон улсын өдөр”-ийг энэ онд "Хүртээмжтэй, тогтвортой ирээдүйн төлөөх хөгжлийн бэрхшээлтэй хүмүүсийн манлайллыг нэмэгдүүлье" уриатай тэмдэглэж байна.

Хөгжлийн бэрхшээлтэй иргэдийн хөгжил, нийгэм, эдийн засагт оролцох оролцоо болон бусад тулгамдаж буй асуудлуудыг хэлэлцэх зорилгоор Монгол Улсын Ерөнхийлөгчийн ивээл дор "ХӨГЖЛИЙН БЭРХШЭЭЛТЭЙ ХҮНИЙ ХӨГЖИЛ, ОРОЛЦОО" үндэсний чуулганыг  зохион байгуулж байна.

Монгол Улсын Ерөнхийлөгч Ухнаагийн Хүрэлсүх чуулганыг нээж хэлсэн үгэндээ, хөгжлийн бэрхшээлтэй иргэдэд чиглэсэн бодлого, шийдвэр, үйл ажиллагааг бүх талаар дэмжихээ илэрхийлсэн юм.

Гэр бүл, хөдөлмөр, нийгмийн хамгааллын сайд Л.Энх-Амгалан “Хөгжлийн бэрхшээлтэй хүний хөгжил оролцоог хангах төрийн бодлого, ололт амжилт, тулгамдсан асуудал” –ын талаар үндсэн илтгэлийг тавьсан.

Манай улсад нийт хүн амын 3.2 хувь буюу 111 мянга гаруй хөгжлийн бэрхшээлтэй иргэд байна.

Нийт хөгжлийн бэрхшээлтэй иргэдийн 84 хувь буюу 93 мянга нь хөдөлмөрийн насны иргэд байгаа хэдий ч дөнгөж 15 мянга нь л хөдөлмөр эрхэлж байгаа нь хангалтгүй үзүүлэлт юм.

Тиймээс хөгжлийн бэрхшээлтэй иргэн бүрийг баялаг бүтээгч, үйлдвэрлэгч болгох чиглэлд бодлого, үйл ажиллагаагаа чиглүүлэх, санхүүжилтээ нэмэгдүүлэх, ахмад настан, хөгжлийн бэрхшээлтэй иргэдийн онцлогт тохирсон ажил, хөдөлмөрийн шинэлэг хэлбэр, үйлчилгээг өргөжүүлэн хөгжүүлэх шаардлага байсаар байна.

Өнөөдрийн энэхүү үндэсний чуулганаар “Хөгжлийн бэрхшээлтэй иргэдийн хөгжил, оролцоог хангах төрийн бодлого, ололт амжилт, тулгамдсан асуудал”, “Эрх зүйн орчны шинэчлэл”, “Нийгмийн оролцоог хангахад иргэний нийгмийн байгууллагын үүрэг, хариуцлага,” “Тогтвортой хөгжилд хөгжлийн бэрхшээлтэй иргэдийн оролцоо-Олон улсын байгууллагын дэмжлэг, хамтын ажиллагаа” зэрэг сэдвийн хүрээнд хэлэлцүүлэг өрнүүлж зөвлөмж гаргах юм.