Гэрэл зураг түүх өгүүлдэг. Үнэний агшинг нотлох гол зүйл бол яах аргагүй гэрэл зураг. Өнө эртнээс гэрэл зураг түүхийн хөгжлийг түгээсээр, олон түмэнд таниулсаар ирсэн урлаг юм. Хувь хүнд фото агшин гайхалтай дурсамж өгүүлдэг бол нийгэм, улс төр, эдийн засаг гээд бүхий л салбарт гэрэл зураг түүх болон он цагийн дараалалд орж, гэрч болон үлддэг зүйл юм. Өчигдөр Монголын ес, гадаадын 10 гаруй гэрэл зурагчны дуран авианд өртсөн “Өнөөдрийн Монгол” гэрэл зургийн үзэсгэлэн Занабазарын музейд нээлтээ хийлээ. Нийт 100 гаруй зураг дэлгэн тавигджээ. 2500 км замыг туулж дээрх гэрэл зурагчид Хэнтий, Дорнодын чиглэлд гарч эдгээр гэрэл зургуудыг дурандаа буулгаж авчээ. Тус үзэсгэлэн нь хоёр дахь жилдээ зохион байгуулагдаж байгаа гэнэ. Үзэсгэлэнг Монголын Гэрэл зурагчдын нэгдсэн холбоо санаачлан Үндэсний мэдээллийн МОНЦАМЭ агентлаг, Үндэсний брэндийн бодлогын зөвлөл хамтран гаргажээ. Ц.Батбаатар, С.Бадамханд , В.Баттулга, Б.Батцэрэн, Э.Цэрэнбаяр, Б.Чадраабал нарын олон гэрэл зурагчид ийнхүү үзэсгэлэнд оролцож байгаа гэнэ. Үзэсгэлэн энэ сарын 25 ны өдрийг хүртэл үргэлжлэх юм байна.