Хятадын Ардын чөлөөлөх арми тив хоорондын, шинэ үеийн баллистик пуужин туршиж байгаа гэрэл зураг, дүрс бичлэг олон нийтийн сүлжээгээр тархлаа. Урьдчилсан мэдээллээр энэ пуужинг зургадугаар сарын 2-ны өглөөгүүр Шаньдун хойгийн дэргэдэх Бохайн булан дахь усан доогуур шумбагчаас харвасан байна. Цэргийн сэдвээр бичдэг Defence Blog сайтад бичсэнээр бол шинэ пуужин цөмийн цэнэг тээвэрлэх чадвартай юм байна. 12-14 мянган км-т тусах чадалтай, гуравдахь үеийн, хатуу түлшний JL-3 пуужингаар тоноглосон цөмийн түлшний усан доогуур шумбагчийг Хятад 2020 оноос Ардын чөлөөлөх армийн зэвсэглэлд авна гэж байгаа юм.