Эрдэнэс Тавантолгой ХК-ийн 1072 хувьцааны 2022, 2023 оны ногдол ашиг тараахаар болоод буй. Гэвч бэлэн мөнгө зах зээлд нийлүүлснээр үнийн өсөлтийг улам хөөрөгдөнө гэж эдийн засагчид үзэж байна. Уг асуудлаар эдийн засагч Р.Шинэгэрэлийн байр суурийг хүргэж байна.

Эдийн засагч Р.Шинэгэрэл:  

-Бэлэн мөнгө тараах нь хамгийн буруу шийдэл байдаг. Маш олон туршлагаар бид мэднэ. Гэхдээ нөгөө талаар иргэдэд хувьцаа гээд өгчихсөн, иргэд хувьцааны ногдол ашгаа авах хүлээлттэй байгаа. Нэг тадаас иргэд ногдол ашгаа авах хүлээлттэй, нөгөө талдаа эрх баригчид сонгууль угтсан бэлэн мөнгө тараах сонирхолтой байдаг. Энэ 2 сонирхлын огтлолцол нь бидэнд эргээд эдийн засгийн ямар хүндрэл авчрахыг таашгүй.

Ганцхан ногдол ашиг гэлтгүй тэтгэвэр тэтгэмжийг огцом нэмж байна, төрийн алба хаагчдын цалинг огцом нэмж байна. 3,4-р сард дахиад нэмэх ярианууд явагдаж байна. Энэ бүгдийг харахад бэлэн мөнгийг маш их хэвлэх юм байна, зах зээл дээр мөнгөний нийлүүлэлтийг асах ихээр нэмэх юм байна. Харин сонгуулийн дараа, ирэх намар эдийн засагт, энэ бүхний дараа хор уршиг үнэ ханшийн өсөлтөөр илэрхийлэгддэг.

10 жилийн өмнө 100 доллар хэдэн төгрөг байсан юм, одоо хэдэн төгрөг болов гэхэд л асар том зөрүү гардаг. Тэгтэл гадаад зах зээл дээрх бараа, бүтээгдэхүүний үнийн өсөлт асар бага байхад монгол дахь үнийн өсөлт төгрөгөөр илэрхийлэхэд 2-3 дахин нэмэгдчихсэн байдаг. Энэ бол бүгд бэлэн мөнгөтэй холбоотой. Сонгууль угтсан шийдвэрийн муу үр дүн үргэлжлээд байна гэсэн үг. Энэ алдаагаа би дахиад давтах гэж байна. Сөрөг үр дагавар нь ямар хэмжээнд ирэхийг таашгүй байна.

Бүх бараа бүтээгдэхүүний үнэ өснө. Иргэдэд ирж байгаа бэлэн мөнөгө чанарын өсөлт авчрахгүй. 100 төгрөгөөр авч байсан талхаа 110 төгрөгөөр авна гэсэн үг. Өнөөдөр 3000 гарчихсан талх 3500 болохыг үгүйсгэхгүй.