Дорноговь аймгийн Иххэт сумын нутаг, сумын төвөөс 15 км зайд Бүсийн чулуу хэмээх байгалийн үзэсгэлэнт газар бий. Энд баруунаас зүүн тийш 27 км үргэлжилж зарим газраа тав, зарим хэсэгтээ 1.5 км өргөн тогтоц бүхий хадан цохионууд байдаг нь намхан л болохоос тогтоцын хувьд яг л Дундговь аймгийн Бага газрын чулуу, Дорноговь аймгийн Даланжаргалын сумын Их Нартын хадтай төстэй. Энд өөрийн гэсэн, Даяанчийн буюу нутгийнхны Гэр хэмээн нэрлэсэн хад, Тугалтай заан хад, Мэлхий хад, Сэнжит хад гэсэн байгаль эхийн урласан сонин тогтоц, хэлбэртэй хад бий. Сумын Засаг даргын Тамгын газар байгаль хамгаалагчид энэ газрыг аймгийн тусгай хамгаалалтад авч, хаяг пайз машины зогсоолтой болгосноор сүүлийн хэдэн жилд аргалийн тоо эрс өсч тоо толгой нь 100 гарсан гэнэ.