Манай улсын Хөлбөмбөгийн холбоо нь Олон улсын Хөлбөмбөгийн холбоотой нягт хамтын ажиллагаатай явж ирсэн. Олон Улсын Хөлбөмбөгийн холбооноос дэлхийн орнуудын хөлбөмбөгийн хөгжлийг дэмжих зорилгоор "FIFA Forward Development Programme" хөтөлбөр хэрэгжүүлдэг.

Гадаад харилцаа, хамтын ажиллагааны хүрээнд манай улстай төсөл хөтөлбөр хэрэгжүүлэхээр гэрээ хэлцлийн анхан шатандаа явж байх үед спортын хөтлөгч Б.Батзаяа тэргүүтэй хүмүүс “FIFA хөтөлбөрийн хүрээнд Монголын Хөлбөмбөгийн холбоонд 1 сая ам.долларын төсөл гэж мөнгө нь орж ирээд, энэ төслийг хэрэгжүүлээгүй, удирдлагууд нь зарцуулаад дууссан” гэх агуулга бүхий худал ташаа мэдээлэл хийв. Энэ талаар Монголын Хөлбөмбөгийн холбооноос мэдэгдэл гаргаж “Манай холбооны дансанд 1 сая ам.доллар орж ирээгүй нь үнэн болно” гэв. Спортын хөтлөгч Б.Батзаяа болон холбоонд ажиллаж буй Техникийн хэлтсийн хэсэг ажилтны энэхүү гүтгэлгийн цаана холбооныхоо удирдлагын эрхийг хууль бусаар авах гэсэн санаархал байж болзошгүй гэх мэдээлэл байна.

Ямартай ч, холбооны үйл ажиллагаанд саад учруулах, улмаар удаа дараагийн энэ мэт худал гүтгэлэг нь Монголоосоо хальж, Олон улсын Хөлбөмбөгийн холбооны өмнө Монгол Улсынхаа нэр хүндийг унагах, цаашдын гадаад хамтын ажиллагаанд сэв суулгах, төсөл хөтөлбөр хэрэгжүүлэхэд саад тотгор учруулж болзошгүй эрсдлийг бий болгоод байна. Ийнхүү Монголын Хөлбөмбөгийн доторх зарим нэг хүний болчимгүй үйлдэл, удирдлагын эрхийг авахыг санаархсан явцуу эрх ашиг нь эцэстээ Монгол Улсынхаа нэр хүндийг олон улсын өмнө шившигт хутгаж орхив.